Universitats e centres de recèrca

Eth TERMCAT manten ua collaboracion permanenta damb es membres dera comunitat universitària, amassadi ena Xarxa Vives d’Universitats, especiaument per çò qu’ei des estudis relacionadi damb era normalizacion des neologismes deth lexic d’especialitat, ar escambi d’informacion sus projèctes terminologics d’interès comun e ara cession de donades terminologiques entà afavorir era maxima difusion dera terminologia catalana.

Eth TERMCAT actue coma centre de practiques entà estudiants procedents d’estudis de grad, postgrad o mastèr de terminologia, lexicografia, traduccion, documentacion, comunicacion, multimèdia e informatica. Eventuaument, tanben acuelh estudiants de matèries especializades (quimica, genetica, filosofia, musica, eca) relacionades damb projèctes terminologics en cors.

Eth Centre tanben impartís sessions d’informacion e presentacions entà grops d’estudiants, professionaus o recercaires interessadi ena terminologia, e organize sessions de formacion especifica sus aspèctes concrèts deth trabalh terminologic.

Demiei es universitats damb es qu'eth Centre manten ua relacion establa de collaboracion en matèria de formacion, destaquen era Universitat Autonòma de Barcelona, era Universitat d’Alacant, era Universitat de Barcelona, era Universitat de Girona, era Universitat de Lleida, era Universitat de València, era Universitat Jaume I, era Universitat Pompeu Fabra, era Universitat Oberta de Catalunya e era Universitat de Salamanca.